Jacinta u tsema vuxaka na Ngizwe Mchunu

Murhangeri wa nhlangano wa March and March, Jacinta Ngobese-Zuma, u tiyisile leswaku va tseme vuxaka na Ngizwe Mchunu.

U vule leswaku nhlangano wu nga ha kongomisi eka timhaka ta ku tumbuluxa swilo swa le ka inthanete.

U te sweswi va kongomisa matimba eka timhaka leti khumbaka vutomi bya vaaki.

Ngobese-Zuma u vule leswaku Mchunu a a rhuketela swirho swa nhlangano nkarhi na nkarhi.

Hambiswiritano, u te va twisisa leswi nga humelela exikarhi ka vona.

U tlhele a vula leswaku nkarhi wa ku tumbuluxa swilo swo koka rinoko wu herile.

Ku hambana loku ku landzela ku nga twanani loku kuleke exikarhi ka matlhelo hamambirhi.

Ku vuriwa leswaku ku nga twanani ku nyanyile endzhaku ka nhlengeletano na Phuresidente Cyril Ramaphosa.

Nhlengeletano leyi yi tlhela yi katsa Ngizwe Mchunu na Nkosikhona “Phakel’umthakathi” Ndabandaba.