Vuxaka bya tiqingho byi kumeka exikarhi ka vanhu lava henhliwaka ku Senzo Meyiwa

Mbhoni yinwana yi tiyisile vuxaka bya tiqingho exikarhi ka vavanuna lava henhliwaka hi ku dlaya Senzo Meyiwa. Ku vuyela emahungwini hi Ravunharhu ekhoto ya le henhla ya Pretoria, muhlahluvi wa datha ya tiqingho Gideon Gouws u vule leswaku vaehleketeleriwa lava swi tikomba va ha vulavula swinwe.

Tiqingho tikomba datha leyi tekiweke eka vahehliwa vo dlaya, Bongani Sandiso Ntanzi na Sifisokuhle Nkani Ntuli va ve hansi ka ku langutiwa hi nkarhi wo tenga nandzu.Vumbhoni byi fambelana na bya muxopaxopi wa tiqingho phorisa Col Lambertus Steyn. Endzhaku ka loko Steyn a humile penceni, Gouws u komberiwile ku xopaxopa data leyi dawunilodiweke eka tifoyini ta Ntanzi na Ntuli ku kambela loko ku ri na ku vulavurisana exikarhi ka vona na vanwana vahehliwa.

 “A ku ri na ku vulavurisana exikarhi ka vahehliwa hinkwavo”, ku vula Gouws. Ntanzi, Ntuli, Muzikawukhulelwa Sibiya, Mthobisi Prince Mncube na Mthokoziseni Ziphozonke Maphisa i va hehliwa va ku dlaya Meyiwa eVosloorus hi Nhlangula 2014 kambe hinkwavo ava pfumelanga nandzu lowu.

 Gouws u nyikile vumbhoni bya leswaku foyini ya Ntanzi a yi nga koti ku dawuniloda tani hi leswi a yi ri na khodi ya le xihundleni, kambe u vule leswaku datha yi humesiwile eka makhadi ya yena mambirhi ya tiSIM na khadi ra memori eka riqingho. Datha yi paluxe leswaku ku na vuhlanganisi exikarhi ka Ntanzi na vamangaleriwa hinkwavo.

Akhawunti ya yena ya Standard Bank leyi tiyisisiweke leswaku i ya yena na yona yi humesiwile eka datha. Datha leyi dawunilodiweke eka khadi ra yena ra memori yi fikile eka pheji 5,471. Eka datha yin’wana ya le khoto, Gouws u vule leswaku swilo leswi kumiweke swi katsa swifaniso swa Ntanzi, xifaniso xa xibamu na xifaniso xa mahungu mayelana na nandzu lowu tekiweke hiti 29 ta Nhlangula 2020. Khoto yi tshame yi twa vumbhoni bya leswaku riqingho ra Ntanzi ri tekiwile hi Nyenyenyani 2021 ePitori loko a ha ri ekhotsweni. Ku kumekile ku vulavula exikarhi ka Ntuli na muehleketeleriwa unwana, Gouws u vule leswaku nomboro ya riqingho ya gqweta ra Ntuli na yona yi tiviwile ku suka eka datha leyi humesiweke. Nandzu wu ya emahlweni.