Mufambisi wa Moja Love a hehliwa hi nandzu waku ringeta ku dlaya

Khoto ya Majistarata ya Soshanguve yi nyikile mufambisi wo lwisana na swidzidziharisi eka nongonoko wa Moja Love beyili ya R5,000, Sizok’Thola, loyi a hehliwaka hi ku ringeta ku dlaya. 

Xolani Maphanga wa malembe ya makume nharhu kaye(39) na murindzi wa yena, Bongani Mkhabela wa malembe ya makume nharhu nharhu(33), loyi a nga mukongomisi xikan’we n’wini wa khamphani ya Tshenolo Private Investigative Company, va hehliwa hi milandzu yinharhu ya ku ringeta ku dlaya na ku nghena hi nkani.

TimesLive yi vikile leswaku Maphanga na ntlawa wa yena va hehliwa leswaku va hlasele vanhu vanharhu eSoshanguve loko nkombiso wu ri karhi wu rhekhodiwa hi Nyenyankulu. 

Mhaka ya ku hlaseriwa hi xikongomelo xo vavisa miri hi ndlela yo vava yi pfuriwile exitichini xa maphorisa xa Soshanguve endzhaku ka ku hehliwa ka ku hlaseriwa.

Muvulavuleri wa National Prosecuting Authority Lumka Mahanjana u vule leswaku hi ti 14 ta Nyenyankulu mufambisi, xikan’we na swirho swin’wana swa vatirhi va Moja Love Show lava nga se tiviwaka, ku hehliwa leswaku va ye endlwini ya mumangari eSoshanguve, va lava swidzidziharisi leswi va vulaka leswaku wa swi xavisa kwale mutini.

“Loko va nga swi koti ku kuma swidzidziharisi leswi, ku hehliwa leswaku lavambirhi va sungule ku hlasela wansati, loyi a nga mumangari emhakeni leyi, a ri na sjambok a n’wi tlimba a tlhela a n’wi vavisa na makwavo wa yena. 

“Endzhaku ka masiku manharhu mhangu yi humelerile wansati loyi u yile aya vika mhaka leyi emaphoriseni,” ku vula yena.

Maphanga na Mkhabela va tinyikerile emaphoriseni hi ti 9 ta Dzivamisoko endzhaku ka loko ku humesiwile xileriso xo khoma, ku vula Mahanjana. 

Eka xikombelo xa vona xa beyili, lavambirhi va arile kuri va endlile  milandzu leyi naswona va kombele ku nyikiwa beyili.

Mfumo a wu kanetanga ku ntshunxiwa ka wona hi beyili kambe wu kombele khoto ku veka swipimelo swa leswaku lavambirhi a va fanelanga ku vulavurisana hi ku kongoma kumbe hi ndlela leyi nga kongomangiki na timbhoni naswona va fanele ku vika eka xitichi xa vona xa maphorisa xa le kusuhi kan’we hi vhiki.

Mhaka leyi yi hundziseriwe emahlweni ku ya fika hi ti 21 ta Mudyaxihi ku ya emahlweni na vulavisisi .